十年、拾年

2007年七月，香港回歸中國十年。呢十年，香港發生左好多大事。
亞洲金融風暴、科網熱、SARS、七一遊行同埋自由行，仲有好多好多.....

咁我呢？
我記得十年前既七一，我應該同我既一班同學等緊會考放榜。不過心情就唔係好緊張，因為當年仲未好知會考對於自己將來既重要性。我傻傻地咁以為會考英文可以唔合格都有人收，唔夠十四分都無乜大不了。 -_-"

結果，好彩大步檻過....

噚晚收到Anda電話，好耐好耐無聲到佢把聲喇！Anda係我一個好好既中學同學加朋友，想當年以兄弟相稱 (不過佢係女仔)，之後大學入左唔同大學，生活環境唔同左，大家就越黎越少聯絡喇。

人就係咁，生活隨住時間不斷改變，身邊既人同事亦然。十年，話長唔長、話短唔短，但已經可以發生好多改變。

呢十年，我由當年等放榜既傻小子，到今日既將為人夫既傻佬。發生既改變不可謂不大。

我相信，黎緊既十年，將會係我另一個黃金十年！